Bəhs olunan növbəti belə hərrac 06 dekabr tarixində baş tutub. Hərracda 5 kiçik dövlət müəssisə və obyekti, 2 istifadəsiz qeyri-yaşayış sahəsi və 5 nəqliyyat vasitəsi özəlləşdirilib.

Xatırladaq ki, hazırda Özəlləşdirmə portalına (privatization.az) daxil olaraq əmlakı seçib sifariş verməklə çox rahat şəkildə hərraca qatılmaq olur. Portalda hərraca çıxarılan hər bir əmlakın coğrafi yerləşməsi, vəziyyəti barədə fotoşəkillər və digər zəruri informasiyalarla tanış olmaq mümkündür.

Hərracların elanı, gedişatı və nəticələri barədə aktiv ictimai məlumatlandırma komitənin saytı, Özəlləşdirmə portalı, eləcə də facebook sosial şəbəkəsindəki rəsmi səhifə və yeni yaradılmış “Privatization.az” səhifəsi vasitəsilə həyata keçirilir. “Privatization.az” facebook səhifəsi sosial şəbəkə vasitəsilə izləyiciləri məhz hərraclar barədə intensiv məlumatlandırmaq üçün yaradılıb. Səhifədə hər bir hərrac tarixi üçün özəlləşdirilməyə çıxarılan kiçik müəssisə, qeyri-yaşayış sahəsi və nəqliyyat vasitəsi barədə detallı paylaşımlar edilir və əmlaka sifariş qaydası göstərilir.

Məlum olduğu kimi, hərracı müşahidə etmək üçün də heç bir məhdudiyyət yoxdur. Yəni istənilən vətəndaş və ya jurnalist hərrac günü Komitənin İnformasiya Texnologiyaları Mərkəzinə (Bakı, H.Əliyev pr., 139A) gəlib hərrac prosesini izləyə bilir.

Bu dəfəki hərracda özəlləşdirilmiş 2 kiçik müəssisə və 2 istifadəsiz qeyri-yaşayış sahəsi paytaxtda, yerdə qalan 3 kiçik müəssisə və obyekt isə Şirvan, Sabirabad və Saatlıda yerləşir. Hərracda ən yüksək qiymətə satılan daşınmaz əmlak paytaxtın Nizami rayonunda yerləşən qeyri-yaşayış sahəsi olub. Belə ki, bu əmlak 180 min manata özəlləşdirilib. 74 min 800 manata özəlləşdirilən “Vüqar” şadlıq evi isə hərracda yüksək qiymətə satılmış növbəti əmlak olub. Adıçəkilən əmlak paytaxtın Suraxanı rayonu, Qaraçuxur qəsəbəsində yerləşir. Nizami rayonunda yerləşən digər qeyri-yaşayış sahəsi isə 55 min manata özəlləşdirilib.

Qeyd edək ki, tamamilə şəffaf, rahat və ictimaiyyətin bütün təbəqələrinə açıq şəraitdə keçirilən belə hərraclar əmlak sahibi olmaq istəyən hər bir vətəndaş üçün böyük imkandır. Çünki hərraca çıxarılan dövlət əmlakları çoxçeşidlidir və investorların maraqlarına uyğundur. Nəhəng müəssisələrdən, səhmdar cəmiyyətlərindən tutmuş kiçik obyektlərə və nəqliyyat vasitələrinə kimi müxtəlif əmlaklar potensial alıcılara təqdim olunur. Vətəndaşların hərraclarda özəlləşdirdikləri belə əmlaklar iqtisadi baxımdan onlar üçün mənfəət mənbəyidir. Əmlaka yiyələnən istənilən vətəndaş sonradan onu biznes predmetinə çevirə, icarəyə verə və ya digər qanunla icazə verilən məqsədlər üçün istifadə edə bilər.

Ümumiyyətlə, yeni başladılan bu özəlləşdirmə prosesi ölkədə iri və orta portfelli sahibkarlığın inkişafına dəstək verir. Eləcə də, müxtəlif iqtisadi sahələrdə, o cümlədən pambıqçılıq, quşçuluq, tikinti, nəqliyyat, xidmət və sair sahələrin canlanmasına və inkişafına təkan olur. Belə müəssisələr və obyektlərdə fəaliyyət yenidən daha müasir şərtlərlə bərpa edilir və bununla da iqtisadi aktivliyə və yeni iş yerlərinin yaradılmasına səbəb olur.

Komitə tərəfindən növbəti hərrac 13 dekabrda keçiriləcək. Hərraca çıxarılan 101 əmlakdan 23-ü səhmdar cəmiyyəti, 43-ü kiçik dövlət müəssisə və obyekti, 19-u istifadəsiz qeyri-yaşayış sahəsi və 16-sı nəqliyyat vasitəsidir. 13 dekabrda keçiriləcək hərracdakı əmlaklarla aşağıdakı linkdə tanış ola bilərsiniz:

http://www.privatization.az/index.php/az/component/content/article?layout=edit&id=916