Daşınmaz əmlak obyektlərinin formalaşdırılması və kadastr planlarının verilməsi: xidmət prosedurları nədən ibarətdir?
Daşınmaz əmlak obyektlərinin formalaşdırılması dedikdə, daşınmaz əmlakın dövlət reyestrində dövlət qeydiyyatına alınmış obyektin bir hissəsinin ayrılması, bölünməsi, birləşdirilməsi ilə bağlı aparılan kompleks kadastr işlərinin məcmusu nəzərdə tutulur. Azərbaycan Respublikası Prezidentinin 2010-cu il 27 iyul tarixli 308 nömrəli Fərmanı ilə təsdiq edilmiş "Azərbaycan Respublikasında daşınmaz əmlakın vahid dövlət kadastrının tərtib edilməsi və aparılması Qaydaları"na uyğun olaraq daşınmaz əmlak obyektlərinin formalaşdırılması və kadastr planlarının verilməsinə dair işlər Əmlak Məsələləri Dövlət Komitəsi tərəfindən aparılır.
Bu xidmət Daşınmaz Əmlakın Kadastrı və Ünvan Reyestri Xidmətinin inzibati binasında və Əmlak Xidmətləri Məkanında göstərilməkdədir. Daşınmaz əmlakın formalaşdırılması və kadastr planlarının verilməsi xidməti üçün istifadəçilərdən sorğu, ərizə, xidmət haqqının ödənilməsi barədə sənəd, torpaqdan daimi istifadə hüququna dair dövlət aktları, hüquqi şəxsin dövlət qeydiyyatı haqqında şəhadətnaməsi və digər sənədlər tələb olunur.